قصة طفل عمرو 16 عام .. ذاق الويلات جراء مرض خبيث في الرأس عافانا وعافاكم الله .كيما تحب وتشتهى.. عمليات تتأجل مرة في جرة مرة .. دواء ما فماش .. من 2017 رحلة العذاب بدات..برا..ايجا..ارجع.. هاو rendez vous..هاو ستنى .. هاو أصبر .. هاو كرني مش خالص.. هات لازم تدفع كذا .. الخ…من مظاهر التخلف الاداري و الصحي في البلاد .. البلاد الي خسرت عليه منحة ب180د وقاتلو هذاكة باش انجمو نعاونوك ..
محمد حفظ اسامي اللواجيستية بين بوحجلة والقروان وسوسة..حفظهم الكل… حفظ الثنية من دارهم لمحطة اللواجات لمحطة الكيران لمحطة النقل الجماعي لمحطة التاكسيات..الكل يعرفهم ويعرفوهمرة واثنين في الجمعة طالع ..هابط..لسهلول على أمل قد يأتي .. ولم يأت محمد ما استسلمش.. و حاول يخدم على روحو رغم أنو اظطر يبطل القراية من السابعة أساسي.. وباع السلق والمعدنوس في سوق بوحجلة.. وكان فرحان وعندو أمل كبير في ربي .. لين جاء النهار الي محمد ماعادش ينجم .. ماعادش يتحمل أكثر…الوجيعة في كل بلاصة .. ووجيعة القلب و الحسرة والألم على بلاد تظلم ومازالت تظلم في ولادها وتتفرج عليهم وهوما يموتو كانتلو أكبر من وجيعة راسو ..من وجيعة الأورام الخبيثة.
…محمد خذا قرار أنو ..يغادر..يحرق..وفي ساعات لقى روحو في لامبادوزا مع بوه ..بوه الي أصر أنو يجرب ٱخر كرطوشة ..الي تنجم تنقذ محمد ..في مركز ايواء اللاجئين في لامبادوزا.. بلاد الكفار! محمد ما قالولوش الكرني مش خالص … ولا هات خلصنا باش تشوف الطبيب .. ولا ستنى موعد ب10 أشهر باش تعمل عملية .. ماقالولوش زاده راو حالتك ميؤوس منها .. كيما قالولو في بلاد المسلمين! محمد في ظرف 48 ساعة جاتو الهيليكوبتر للملجأ في لامبادوزا و هزتو وطارت بيه مع بوه لأكبر مستشفى حكومي في مدينة نابولي الايطالية .. وين هو مقيم حاليا .. اطباء من مختلف الاختصاصات واطارات طبية وشبه طبية داخلين خارجين توا 3 أيام.. تشوف كان التحاليل و صور الأشعة ماشين بيها جايين .. ومحمد عاطيهم روحو… مسلمهم حياتو..بكل طمأنينة و ارتياح ورضا … رضا برحلة الموت الي خاضها من أجل الحياة ..