منير الفلاح: صابر الرباعي ما ينجمش يكون فنان وصوته لا يطربني

كتبت الاستاذة Saloua Charfi Ben Youssef ان مدير مهرجان باجة الدولي قال : “ميزانية المهرجان 170 ألف دينار منها 85 ألف دينار لصابر الرباعي”…عمري ما فهمت اش نوة صابر الرباعي. يمعوق في كلام كي الظلام وماثقل سليخته…
شخصيا أشاطر رأي الدكتورة واضيف:

سمعت صابر الرّباعي في موزاييك يفسر كيفاش باش يخلص من مهرجان مدينته واهله واماليه صفاقس 85 مليون الي هي نسبة مهمة من ميزانية الدورة وقال الي هاك سعر خاص حددو لكافة مهرجانات الجمهورية…
قعدت باهت كيفاش يحكي هكّة معتبرا روحو فلتة فنيّة عربيّة وهو حسب رأيي مؤدّي بارع لكن موش فنّان كبير …
نتذكّر مرّة في التلفزة نحضّر في منوّعة السّبت حول ما يحدث في غزّة وحب المنشّط علاء الشابي يستدعيه ليقوم بإطلالة خاصّة يقدّم الكليب الّي عملو على القضيّة الفلسط..ينيّة فماطل و تهرّب لأنّو عارف الّي الإطلالة باش تكون بدون مقابل..و هوّ داه فلوس…

ونتذكّر نهارتها أكبر وصف ليه خرج من فم الرّئيس المدير العام وقتها الّي قال نفّخوه هاك كي سلعة باتام كان المنظر امّا الجودة يجيبها ربّي…
وقتها قفزت الى ذهني انّو أوّل حفل أقامو في قرطاج كان في عهد سي حسن بوزريبة اللّه يرحمو وكنت الكاتب العام متاع المهرجان وكانت ادارة باتام تكفّلت بمصاريف العرض كلّها وزيد على ذلك شرات اكبر عدد من التّذاكر عن طريق مدير أعمالو وقتها حاتم العايب وهكة نجم يعمل نسبة حضور محترمة…
صابر الرّباعي صنيعة فنيّة ناجحة اكيد ومؤدّي بارع أكيد لكن عمرو ما كان فنّان كبير …حسب رأيي طبعا…